TEHILLIM 121

תהלים קכא

From site he.wikisource.org/

א שִׁ֗יר לַֽמַּ֫עֲל֥וֹת
אֶשָּׂ֣א עֵ֭ינַי אֶל־הֶהָרִ֑ים
  מֵ֝אַ֗יִן יָבֹ֥א עֶזְרִֽי׃
ב עֶ֭זְרִי מֵעִ֣ם יְהֹוָ֑ה
  עֹ֝שֵׂ֗ה שָׁמַ֥יִם וָאָֽרֶץ׃
ג אַל־יִתֵּ֣ן לַמּ֣וֹט רַגְלֶ֑ךָ
  אַל־יָ֝נ֗וּם שֹׁמְֿרֶֽךָ׃
ד הִנֵּ֣ה לֹֽא־יָ֭נוּם וְלֹ֣א יִישָׁ֑ן
  שׁ֝וֹמֵ֗ר יִשְׂרָאֵֽל׃
ה יְהֹוָ֥ה שֹׁמְֿרֶ֑ךָ
  יְהֹוָ֥ה צִ֝לְּֿךָ֗ עַל־יַ֥ד יְמִינֶֽךָ׃
ו יוֹמָ֗ם הַשֶּׁ֥מֶשׁ לֹֽא־יַכֶּ֗כָּה
  וְיָרֵ֥חַ בַּלָּֽיְלָה׃
ז יְֽהֹוָ֗ה יִשְׁמׇרְךָ֥ מִכׇּל־רָ֑ע
  יִ֝שְׁמֹ֗ר אֶת־נַפְשֶֽׁךָ׃
ח יְֽהֹוָ֗ה יִשְׁמׇר־צֵאתְֿךָ֥ וּבוֹאֶ֑ךָ
  מֵ֝עַתָּ֗ה וְעַד־עוֹלָֽם׃